SGS lýsir yfir fullum stuðningi við boðað verkfall Eflingar

Samninganefnd Starfsgreinasambands Íslands (SGS) lýsir yfir fullum stuðning við verkfall félagsmanna í Eflingu sem boðað hefur verið til þann 8. mars næstkomandi.

Þetta kemur fram í tilkynningu frá SGS en þar eru félagsmenn innan sambandsins jafnframt hvattir til þess að ganga alls ekki í störf félagsmanna Eflingar komi til verkfalls.

Efling hefur boðað til verkfalls næstkomandi föstudag hjá ræstingafólki á hótelum og gistiheimilum. Samtök atvinnulífsins telja verkfallsboðunina ólöglega og er mál samtakanna gegn Eflingu nú fyrir Félagsdómi.

Niðurstöðu Félagsdóms varðandi það hvort verkfallsboðunin er ólögleg eður ei er að vænta á morgun.