Rafmagnsleysi í Venesúela

Skólar voru enn lokaðir og vinnustaðir sömuleiðis í Venesúela í gær á öðrum degi umfangsmikils rafmagnsleysis. Vandræðin hófust á fimmtudag og eru rakin til bilunar í stærsta vatnsorkuveri landsins.

Ríkisstjórn Nicolas Maduro forseta hefur ekki átt sjö dagana sæla að undanförnu. Ofan á efnahagshamfarirnar sem hafa skollið á ríkinu hefur þingið, sem Maduro álítur valdalaust, gert Juan Guaidó þingforseta að starfandi forseta landsins.

Þótt fjölmörg ríki heims álíti Guaidó nú forseta landsins heldur Maduro enn völdum. Rafmagnsleysið er þó ekki til þess fallið að lægja öldurnar heima fyrir.