„Þetta er ekki uppboð á notaðri bifreið“

Halldór Benjamín Þorbergsson framkvæmdastjóri Samtaka atvinnulífsins, SA, ítrekar að rými samtakanna í kjaraviðræðum sé takmarkað. Mikilvægt sé að „hleypa ekki verðbólgunni af stað“ með of miklum launahækkunum. Þá sagði hann alla hlutaðeigandi tapa á verkföllum ef til þeirra komi.

Fram kom í gær að formenn Eflingar, VR, Verkalýðsfélags Grindavíkur og Verkalýðsfélags Akraness hafa allir fengið umboð frá sínum félagsmönnum til að slíta viðræðum við Samtök atvinnulífsins. Félögin funda með SA síðdegis í dag en Sólveig Anna Jónsdóttir, formaður Eflingar, sagði í samtali við Fréttablaðið í morgun að hún búist við viðræðuslitum.

Mikilvægt að sporna við uppsögnum

Halldór ræddi stöðu kjaraviðræðanna í útvarpsþættinum Bítinu á Bylgjunni í morgun. Þar sagði hann SA hafa lagt fram tilboð sem samtökin ætli að vinna með við lausn þessarar kjaradeilu. Takmörk séu á svigrúmi í viðræðunum af hálfu samtakanna.

„Það liggur alveg fyrir að þetta er ekki uppboð á notaðri bifreið. Hér verður ekki farið fram og til baka og kallað eftir nýjum og nýjum tilboðum, því þannig starfa Samtök atvinnulífsins einfaldlega ekki. Við áætlum í upphafi hvað er þanþol atvinnulífsins til að standa undir launahækkunum á næstu árum, næstu þremur árum, og það er það sem við bjóðum í okkar tilboði til samningsaðila vegna þess að þær forsendur sem við gefum okkur skipta öllu máli,“ sagði Halldór.

„Þær eru að við getum skapað skilyrði fyrir lækkun vaxta, að við hleypum ekki verðbólgunni af stað, að fyrirtækin þurfi ekki að fara í verðhækkanir og að fyrirtæki þurfi ekki að halda áfram í því hagræðingarferli sem hafið er og heitir á íslensku uppsagnir.“

Væntingar um skattalækkanir skemmt mikið fyrir

Verkalýðsleiðtogar hafa margir lýst yfir vonbrigðum með skattkerfisbreytingar ríkisstjórnarinnar sem kynntar voru í vikunni. Drífa Snædal forseti ASÍ sagðist til að mynda hafa búist við því að stjórnvöld myndu ganga lengra í átt að jöfnuði með tillögum sínum og lækka frekar skatta á þá lægst launuðu. Halldór furðaði sig á væntingum um skattkerfisbreytingarnar og sagði þær hafa komið sér illa fyrir kjaraviðræðurnar.

„Ég veit ekki og skil ekki, og það er eitthvað sem þið getið rannsakað, hvaðan koma þær væntingar að skattaútspil ríkisstjórnarinnar ætti að vera margfeldi af því sem kynnt var, þegar það hefur legið fyrir í fimmtán mánuði í stjórnarsáttmála ríkisstjórnarinnar með hvaða hætti tekjuskattkerfið myndi þróast á kjörtímabilinu,“ sagði Halldór.

„Ég á mjög erfitt með að átta mig á því hvaðan væntingar um margfeldi þessara skattalækkana eru komnar, því þær hafa skemmt mikið fyrir.“

 

„Verkföll eru allra tap“

Komið hefur fram að eftir fund verkalýðsfélaganna og SA í dag muni félögin koma saman til fundar og ræða hvort boða skuli til verkfalls. Inntur eftir því hvort stefni í verkföll sagðist Halldór Benjamín ekki myndu spá því að til þess kæmi. Hann hamraði þó á því að verkföll væru afar slæm fyrir atvinnulífið.

„Verkföll eru allra tap. Bara það að atkvæðagreiðsla hefjist um verföll, verkfallsboðanir, veldur gríðarlegu fjárhagslegu tjóni í samfélaginu og fyrir fyrirtæki, sjáiði, bara það að hefja atkvæðagreiðslu dregur úr getu fyrirtækja til að hækka laun í framhaldi.“