Brunaði yfir á rauðu ljósi eftir að gangbrautarvörður var farinn

Á þeim hálftíma sem stuðningsfulltrúi við Vesturbæjarskóla sinnti gangbrautarvörslu á gatnamótum Hringbrautar og Meistaravalla í morgun var allt með kyrrum kjörum. Um er að ræða gönguljós þar sem slys varð í gærmorgun þegar bíl var ekið á þrettán ára stúlku.

Þá var lögreglumaður á mótorhjóli sem fylgdist með gangi mála. Hann giskaði á að líklega hefðu um fjörutíu börn farið yfir gönguljósin við Meistaravelli á þessum hálftíma. Hann sagði að lögreglan yrði á svæðinu fyrstu tvo til þrjá morgnana til að vekja athygli á gatnamótunum. Hvort það var vera lögreglumannsins, vestisklædda gangbrautavarðarins, fjölmiðla eða slysið í gær þá virtust ökumenn aka gætilega á Hringbrautinni í morgun.

Augnablikum eftir að gangbrautarvörðurinn var farinn til vinnu í Vesturbæjarskóla og lögreglumaður horfinn á braut mætti ungur drengur á svæðið og hugðist fara yfir. Hann ýtti á takkann og beið eftir grænu ljósi. Á því augnabliki sem umferðarljósið varð rautt ók ökumaður á stórum jeppa yfir. Blaðamaður náði augnablikinu á mynd eins og sjá má að ofan.

Ungi drengurinn fór að öllu með gát þegar gönguljósið varð grænt, horfði til beggja hliða áður en hann lagði af stað yfir götuna.

Segjast reglulega sjá bíla aka yfir á rauðu 

Jóhannes Tryggvason, foreldri barna í Vesturbæjarskóla sem búsett eru sunnanmegin við Hringbraut, stóð sjálfur vaktina í gulu vesti á gatnamótum Hringbrautar og Framnesvegar í morgun. Hann tjáði blaðamanni að til stæði að gera það áfram og bæði eiginkona hans og tengdafaðir ætluðu að skipta vöktunum á milli sín. Fleiri væru velkomnir. Gatnamótin væru hættulegri en gönguljósin við Meistaravelli ef eitthvað væri.

Við gönguljósin á Meistaravöllum var stuðningsfulltrúi í skólanum, klæddur í gult vesti. Hann fylgdi börnunum yfir sem flest hver voru ein á ferð. Þó rakst blaðamaður á tvo feður með börn sín. Báðir sögðust reglulega sjá bíla keyra of hratt og strauja yfir á rauðu ljósi.

Uppi varð fótur og fit í FB-hópnum Vesturbærinn eftir slysið í gær. Sem betur fer slasaðist stúlkan ekki alvarlega en hún var þrettán ára og á leið í Hagaskóla. Lögreglumaðurinn sem blaðamaður ræddi við í morgun hafði ekki orðið var við mörg börn eða unglinga á leiðinni yfir gönguljósin í suðurátt, þ.e. í áttina að Hagaskóla.

Tifandi tímasprengja

Foreldrar og íbúar bæjarins telja margir aðeins tímaspursmál hvenær slys yrði á gönguljósunum. Foreldrar sunnan Hringbrautar segjast í lengri tíma hafa óskað eftir gangbrautarvörslu við Hringbraut, á gatnamótunum við Framnesveg, en fengið þau svör frá skólastjóra að svæðið sunnan Hringbrautar heyrði ekki undir Vesturbæjarskóla heldur Grandaskóla.

Reykjavíkurborg hefur boðað til fundar í næstu viku með fulltrúum Vegagerðarinnar, lögreglu og íbúum þar sem málið verður frekar til umræðu. Í tveggja ára gamalli skýrslu um umferð vestan Kringlumýrarbrautar sem unnin var fyrir borgina er lagt til að lækka hámarkshraða víða og fjölga 30 km/klst svæðum.