Búið er að opna Gatwick-flugvöllinn á ný eftir að flugvallaryfirvöld neyddust til að loka honum og stöðva alla flugumferð vegna dróna sem var á sveimi yfir vellinum.
Gatwick er næst stærsti flugvöllurinn á Bretlandseyjum en hann hefur verið lokaður meira og minna í einn og hálfan sólahring vegna drónaflugs á svæðinu. Drónarnir hafa sett ferðaáætlanir hundruð þúsunda úr skorðum og ljóst er að tjónið er gífurlegt.
Talskona Gatwick-flugvallarins staðfesti í samtali við breska ríkisúvarpið BBC að ábendingar um að drónarnir hefðu sést á sveimi í kvöld hafi reynst á rökum reistar. Flugvallayfirvöld neyddust til að aflýsa flugi af öryggissjónarmiðum.
Lögreglan í Sussex telur að fleiri en einn hafi verið að verki en hún telur þó ólíklegt að sökudólgarnir tengist hryðjuverkasamtökum.
