John Kelly hættir sem starfsmannastjóri Hvíta hússins fyrir áramót

Donald Trump Bandaríkjaforseti hefur tjáð blaðamönnum að starfsmannastjóri hans, John Kelly, muni láta af störfum fyrir áramót þrátt fyrir fyrri yfirlýsingar að hann myndi starfa út kjörtímabilið.  

Sjá einnig: Bræði og óreiða í Hvíta húsinu

Samband forsetans og starfsmannastjórans er sagt hafa staðið völtum fótum í talsverðan tíma og í dag staðfesti forsetinn að Kelly væri á förum. Mikið hefur gengið á í samskiptum forsetans og starfsmannastjórans og mun Kelly hafa kallað Trump „fífl“ nokkrum sinnum svo starfsmenn Hvíta hússins hafa heyrt til.

„Hann er frábær náungi,“ sagði Trump við blaðamenn í dag þegar hann var á leið sinni á fótboltaleik í Fíladelfíu. „Ég er þakklátur fyrir hans störf.“

Þá sagði forsetinn að eftirmaður Kelly yrði nefndur á næstu dögum en Kelly hefur starfað sem starfsmannastjóri Hvíta hússins síðan í júlí í fyrra.