Konu í Sviss stefnt fyrir meiðyrði vegna Hlíðamálsins

Mennirnir tveir, sem sakaðir voru um kynferðisbrot í Hlíðunum árið 2015, hafa stefnt íslenskri konu búsettri í Sviss fyrir meiðyrði. Mennirnir krefjast þess að ummæli sem konan birti á Twitter og Facebook í nóvember 2015 verði dæmd dauð og ómerk. Þeir krefja konuna einnig um 2 milljónir hvor í skaðabætur. Stefna á hendur konunni birtist í Lögbirtingablaðinu í dag. RÚV greindi fyrst frá.

Varaði við stefnendum og kallaði þá raðnauðgara

Ummælin sem konunni er stefnt fyrir eru öll á ensku og voru birt þann 9. nóvember 2015. Fyrstu ummælin birti konan á Twitter þar sem hún varaði fólk við stefnendum og kallaði þá raðnauðgara („serial rapists“). Með færslunni fylgdi mynd með upplýsingum um nöfn stefnenda og Facebook svæði þeirra, að því er segir í stefnu.

Þá kemur einnig fram að sama dag hafi hún skrifað og birt svipaða færslu á Facebook, en auk þess að vara við stefnendum þá bætti hún því við að þeir væru raðnauðgarar, sem dópuðu konur og nauðguðu þeim svo í íbúð sérstaklega útbúinni til nauðgana. Þá kallaði hún stefnendur skrímsli („monsters“). Með henni fylgdu hlekkir á fréttir um meint kynferðisbrot stefnenda auk upplýsinga um nöfn þeirra og Facebook svæði. Þá hafi færslan verið opin og á ensku til þess að hún næði til sem flestra.

Þá birti konan tvær færslur á Facebook til viðbótar en þar sagðist hún m.a. vera búin að vara tvo vini sína við mönnunum, sem hefðu fjarlægt þá af vinalista sínum á Facebook.

Í stefnu mannanna í Lögbirtingablaðinu kemur fram að konunni hafi verið boðið að ljúka málinu utan réttar með kröfubréfi dagsettu 27. apríl 2016. Hún hafi kosið að svara því bréfi ekki og þannig sé stefnendum nauðugur einn sá kostur að höfða dómsmál „til þess að verja æru sína og friðhelgi einkalífs”.

Segjast hafa óttast um líf sitt vegna múgæsings

Forsögu Hlíðamálsins má rekja til þess að Fréttablaðið greindi frá rannsókn lögreglu á nauðgun í íbúð í Hlíðunum. Vakti sérstaklega athygli að íbúðin var sögð útbúin til nauðgana. Fréttirnar vöktu mikla reiði og leiddu meðal annars til mótmæla fyrir utan lögreglustöðina á Hverfisgötu. Öllum kærum á hendur mönnunum tveimur var vísað frá og töldu þeir sig hafa orðið fyrir töluverðum miska vegna umfjöllunar um málið.

Í stefnunni í dag segir jafnramt að mennirnir hafi óttast um líf sitt vegna múgæsingsins sem umfjöllun um málið hafi skapað og hrökklast úr landi. Ljóst sé að virðing, æra og persóna þeirra hafi beðið hnekki vegna ummæla konunnar.

Stundin greindi frá því í síðustu viku að fjórum einstaklingum hefði verið stefnt vegna ummæla sem þeir viðhöfðu í tengslum við Hlíðamálið og að þar á meðal væri einn búsettur erlendis. Vilhjálmur H. Vilhjálmsson lögmaður mannanna vildi ekki tjá sig frekar um málið í samtali við Stundina. Ekki náðist í Vilhjálm við vinnslu fréttarinnar í dag.