Jóhannes Þór nýr framkvæmdastjóri Samtaka ferðaþjónustunnar

Jóhannes Þór Skúlason hefur verið ráðinn framkvæmdastjóri Samtaka ferðaþjónustunnar. Þetta kemur fram í tilkynningu frá samtökunum og þar segir að Jóhannes Þór hafi verið valinn úr hópi 41 umsækjanda um starfið.

Jóhannes Þór er með BA próf í sagnfræði frá Háskóla Íslands auk þess að vera með kennsluréttindi frá sama skóla.

Undanfarið hefur Jóhannes Þór starfað sem aðstoðarmaður Sigmundar Davíðs Gunnlaugssonar, formanns Miðflokksins. Þá var hann einnig aðstoðarmaður Sigmundar Davíðs þegar hann gegndi embætti forsætisráðherra.

Þá hefur Jóhannes Þór starfað sem grunnskólakennari og almannatengslaráðgjafi ásamt því að hafa verið talsmaður InDefence hópsins.

Jóhannes Þór hefur störf hjá SAF 10. júní næstkomandi. Hann tekur við af Helgu Árnadóttur sem verið hefur framkvæmdastjóri samtakanna frá árinu 2013.