Hvalfjarðargangaleið með Miklubraut og borgarlínu

Samfylkingin kynnti helstu áherslumál flokksins fyrir borgarstjórnarkosningarnar í Reykjavík í Gamla Bíó í dag. Efst á lista eru fyrirætlanir um að ráðast strax í framkvæmdir við borgarlínu og að Miklabraut verði samhliða sett í stokk.

„Við sjáum fyrir okkur að það væri hægt að flýta þessum framkvæmdum með að fara nokkurs konar Hvalfjarðagangaleið þar sem borgin myndi fjármagna í samvinnu við önnur sveitarfélög, eða ein og sér, flýtingu framkvæmdanna, jafnvel þótt greiðslur ríkisins kæmu á lengri tíma," segir Dagur B. Eggertsson, formaður Samfylkarinnar og oddviti flokksins í Reykjavík.

Stofnað yrði félag um framkvæmdina sem borgin myndi fjármagna með lánsfé.

„Það sem hefur staðið í fólki varðandi einkaframkvæmd eru slæm lánskjör og þannig óþarflega hár vaxtakostnaður. Borgin stendur hins vegar sterkt og getur nýtt sterka stöðu sína til þess að fjármagna þetta verkefni," segir Dagur og bætir við að hægt væri að hefja fyrstu framkvæmdir á næsta ári.

Hvenær gæti þetta þá orðið að veruleika?

„Ætlum við þurfum ekki að semja fyrst en að okkar mati væri hægt að fara í fyrsta áfanga eða fyrstu 35 kílómetrana á næstu fimm árum."

Frummatsskýrsla um stokk fyrir bílaumferð um Miklubraut frá Snorrabraut og austur fyrir Kringlu var kynnt fyrr í vetur og er áætlaður kostnaður um 21 milljarður króna. „Borgarlínan verður þá á yfirborðinu og hröð gegnumstreymis umferð færi neðanjarðar," segir Dagur.

Flokkurinn kynnti einnig fleiri kosningamál líkt og aukna áherslu á geðheilbrigði og sókn í leikskólamálum. Nýlega voru kynntar hugmyndir um byggingu 500 hagkvæmra íbúða fyrir fyrstu kaupendur og vill flokkurinn byggja 500 til viðbótar á kjörtímabilinu.

„Þannig við mætum betur þeirri eftirspurn frá ungu fólki og fyrstu kaupendum sem markaðurinn er ekki að sinna," segir Dagur.