Sérveitin kölluð út að vopnaðri líkams­á­rás á Sel­fossi

Þorsteinn M. Kristinsson, aðalvarðstjóri lögreglunnar á Suðurlandi, segir í samtali við Vísi að lögreglunni hafi fyrst borist tilkynning um slagsmál á Selfossi rétt fyrir klukkan 15 þar sem grunur var uppi að vopn hafi verið notuð. 

Lögregla hafi óskað eftir aðstoð sérsveitar Ríkislögreglustjóra og var einn maður handtekinn í aðgerðinni. Hann segir að vopn hafi verið notað, þó ekki skotvopn, og að einhverjir áverkar séu á fólki. 

Varðstjórinn svarar játandi spurður hvort málið sé rannsakað sem líkamsárás. Upp úr klukkan 15 sást til lögreglubíla og bíls sérsveitar aka niður Kamba í austurátt og beygja svo í átt að Selfossi.

Í tilkynningu frá lögreglunni segir að sjúkraflutningamenn Heilbrigðisstofnunar Suðurlands hafi verið í viðbragðsstöðu. 

Sjónarvottur, sem vill ekki láta nafn síns getur, segir við Vísi að hann hafi séð lögreglumenn ganga inn í fjölbýlishús að Álftarima 9 með múrbrjót meðferðis til þess að brjóta niður hurð.

Á myndskeiðum frá vettvangi má sjá mann klæddan í röndótta yfirhöfn tekinn höndum af lögregluþjónum.

Frétt hefur verið uppfærð.