Vilja nýta dúkkurnar í starfi með einhverfum

Leikskólabörn klæddust bláu í dag til að auka vitund um einhverfu og í World Class dansaði fólk Zumba til að styrkja átakið. Átta leikskólar fengu afhentar fjörtíu dúkkur sem eiga að koma að gagni í starfi með einhverfum börnum.

Börnin á leikskólanum Laugasól voru flest bláklædd í dag líkt og margir aðrir enda var blái dagurinn haldinn hátíðlegur í fimmta sinn í dag. Dagurinn er hluti af átakinu Blár apríl þar sem markmiðið er að auka þekkingu fólks á einhverfu. Formaður styrktarfélagsins segir einhverfu eiga sér margar birtingarmyndir.

„Þetta er afskaplega ólíkt milli einstaklinga og við viljum fyrst og fermst að fólk geri sér grein fyrir því hvað einhverfa er, hversu mismunandi hún er, að fólk sé opið fyrir því að fólk sé alls konar og að það sé bara í góðu lagi," segir Ragnhildur Ágústsdóttir, formaður styrktarfélagsins Blár apríl.

Nýsköpunarfyrirtækið RóRó afhenti átta leikskólum fjörtíu Lúlla dúkkur í dag en skólarnir voru valdir í samvinnu við Greiningar- og ráðgjafarstöð ríkisin og tekið var mið af því hvaða leikskólar eru með hæsta hlutfallið af börnum með einhverfu. Fær hvert barn sína eigin dúkku til að hafa á leikskólanum eða heima.

„Við höfum fengið sögur af því að þetta hjálpi þeim að komast í ró og festa svefn en rannsóknir sýna að mörg börn einhverfu eiga erfitt með það," segir Eyrún Eggertsdóttir, stofnandi RóRó. „Svo eru margir sem eiga kannski í erfiðleikum með snertingu við fólk en hafa samt snertiþörf og finnst gott að snerta mjúka hluti," segir hún.

Fyrirtækið mun síðan leita viðbragða. „Við höfum fengið mikið af sögum hvernig þetta nýtist börnum heima fyrir og nú erum við forvitin að sjá hvernig þetta getur nýst í aðstæðum inni á leikskólaum og vonandi getum við haldið áfram með það verkefni," segir Eyrún.