Draga í land um aldurstakmarkanir við kaup árásarvopna

Starfsmenn Hvíta hússins hafa kynnt nýja áætlun til að koma í veg fyrir skotárásir í skólum í Bandaríkjunum. Ætlunin fylgir ekki orðum Donald Trump, forseta Bandaríkjanna, um að hækka lágmarksaldur kaupenda hálfsjálfvirkra riffla upp í 21. Þess í stað vill ríkisstjórnin vopna kennara og styrkja bakgrunnsskoðanir við kaup skotvopna.

Þar að auki vill ríkisstjórnin hjálpa einstökum ríkjum að greiða fyrir þjálfun kennara og stofna nefnd um skólaöryggi sem ætlað verður að finna lausnir. Betsy DeVos, menntamálaráðherra Bandaríkjanna, mun stýra nefndinni sem einnig mun kanna hvort að tölvuleikir og umfjöllun fjölmiðla hafi áhrif á fjölda skotárása í Bandaríkjunum.

Embættismenn segja áætlunina til marks um loforð Trump að grípa til aðgerða í kjölfar skotárásarinnar í Flórída þar sem sautján manns létu lífið.

DeVos sagði blaðamönnum í nótt að um þýðingarfullar aðgerðir væru að ræða, sem hægt væri að fara í nú þegar. Eftir fyrri árásir hefði umræðan of oft snúist um umdeildustu atriði byssueignar í Bandaríkjunum. Áætlun þessarar ríkisstjórnar væri „raunsæ“.

Passa sig að ergja NRA ekki

Stuðningsmenn hertrar löggjafar gagnrýndu aðgerðir ríkisstjórnarinnar og segja þær ekki ganga nógu langt. Chuck Schumer, leiðtogi minnihlutans í öldungadeildinni, sagði ríkisstjórnina einungis taka barnaskref svo þeir myndu ekki ergja samtök byssueigenda, NRA.

Stærstu kennarasamtök Bandaríkjanna hafa sömuleiðis gagnrýnt harðlega þær hugmyndir um að vopna kennara í skólum.

Í kjölfar árásarinnar í Flórída hélt Trump nokkra fundi þar sem hann ræddi við eftirlifendur, nemendur, kennara og fleiri. Á einum slíkum fundi sagði hann réttast að velta vöngum yfir því að hækka lágmarksaldur kaupenda svokallaðra árásarvopna.

„Sko, þetta er ekki vinsæl skoðun, innan NRA. En ég ætla samt að segja þetta. Þú getur ekki keypt skammbyssur fyrr en þú ert 21 árs. En þú getur keypt vopn eins og notað var í árásinni þegar þú ert 18 ára. Ég held að það sé eitthvað sem þú þarft að hugsa um.“

Starfsmenn Hvíta hússins segja nú að sú umræða verði að eiga sér stað í hverju ríki fyrir sig og að nefnd DeVos myndi skoða málið.



Þar að auki kemur áætlunin ekkert að því að gera bakgrunnskannanir skilyrði fyrir kaupum skotvopna á byssusýningum og á internetinu. Það verður einnig skoðað af nefndinni.

Ekki hrifinn af nefndum

Trump virðist þó ekki hrifinn af nefndum því, eins og Washington Post bendir á, hæddist hann að nefnd um fíkniefnavanda Bandaríkjanna á kosningafundi um helgina.



„Haldið þið að fíkniefnasalar, sem drepa þúsundir á lífstíð sinni, haldið þið að þeim sé ekki sama um nefndir? Eina leiðin til að leysa fíkniefnavandann er með hörku,“ sagði Trump.