Svali H. Björgvinsson hefur verið ráðinn til að stýra stefnumótun og viðskiptaþróun hjá Sjóvá og mun hann heyra undir forstjóra félagsins. Svali hefur víðtæka reynslu af rekstri og stjórnun fyrirtækja.
Síðustu 9 ár hefur hann verið framkvæmdastjóri mannauðs- og stefnumótunarsviðs Icelandair, 2003 - 2008 var hann framkvæmdastjóri mannauðssviðs Kaupþings og þar áður meðeigandi PricewaterhouseCoopers. Þá hefur hann yfirgripsmikla reynslu af kennslu á sviði stjórnunar og haldið fjölda fyrirlestra um efnið.
„Við hjá Sjóvá erum að ráðast í yfirgripsmikla vegferð sem snýr að stafrænni þróun. Slík vegferð tengist öllum þáttum starfseminnar og í Svala fáum við góðan mann sem mun halda utan um þessa vinnu í samvinnu við fjölda sérfræðinga sem að verkinu koma,“ segir Hermann Björnsson, forstjóri Sjóvá, um ráðninguna.
Svali er kvæntur Ingu Sigrúnu Jónsdóttur og eiga þau þrjú börn.
