Ekki leitað að Ríkharði í dag

Ekki er fyrirhuguð skipulögð leit að Ríkharði Péturssyni í dag en Ölfusá verður áfram vöktuð. Þetta segir Jón Hlöðver Hrafnsson, rannsóknarlögreglumaður hjá lögreglunni á Suðurlandi.

Lýst var eftir Ríkharði í síðustu viku og leituðu tugir björgunarsveitarmanna að honum á föstudag og laugardag. Þá voru bakkar Ölfusár gengnir í gær en leit hefur ekki borið árangur.

Aðspurður hvort að talið sé að Ríkharður hafi farið í Ölfusá segir Jón Hlöðver það vissulega einn möguleika. Hann segir að því miður hafi engar nýjar vísbendingar borist í málinu.