Fjögurra ára fangelsi fyrir að smygla 3 kílóum af MDMA til landsins

Héraðsdómur Reykjaness dæmdi á dögunum fjóra pólska ríkisborgara til fjögurra ára fangelsisvistar fyrir að hafa staðið saman að innflutningi á tæpum þremur kílóum af MDMA, ætluðu til söludreifingar hér á landi í ágóðaskyni.

Mennirnir heita Lukasz Modszelewski og Pawel Piekarski.

Samkvæmt ákæru í málinu flutti Pawel fíkniefnin frá Hollandi til Íslands, falin í sérútbúnu geymsluhólfi í innréttingu bifreiðar af gerðinni Opel Omega sem hann hafði ekið frá Zoetermeer í Hollandi til Danmerkur og þaðan með farþegaferjunni Norrænu sem kom til Seyðisfjarðar þriðjudaginn 25. apríl 2017.

Sjá einnig: Tveir menn í haldi grunaðir um að smygla nokkrum kílóum af sterkum fíkniefnum

Pawel ók bifreiðinni áleiðis til Keflavíkur og sótti Lukasz sem kom með flugi frá Stokkhólmi þann 26. apríl síðastliðinn. Óku þeir þá bifreiðinni að gistiheimilinu Hjarðarbóli í Ölfushreppi þar sem Lukasz fjarlægði hluta ofangreindra fíkniefna úr bifreiðinni og voru þeir handteknir á gistiheimilinu þann 27. apríl síðastliðinn, en fíkniefnin fundust við leit á herbergi þeirra á gistiheimilinu og í bifreiðinni.

Í dómi Héraðsdóms Reykjaness kemur fram að lögreglan lagði hald á bíls Pawels. Við leit í honum fundust fjórar sams konar pakkningar af fíkniefnum og fundist höfðu í herberginu í gistiheimilinu. Í rannsóknargögnum lögreglu kemur fram að við leitina hafi þurft að losa hanskahólfið í bílnum, fjarlægja loftpúðann á bak við hólfið og einnig grind þá sem loftpúðinn var festur á.

Sjá einnig: Löggan vissi af dópinu

Þar fyrir innan hafi komið í ljós gat sem búið var að gera á bita sem lá þvert yfir bílinn. Inni í bitanum hafi lögregla síðan fundið áðurnefndar fjórar pakkningar með fíkniefnum.

Lukasz neitaði sök við þingfestingu málsins en við aðalmeðferð skýrði hann hins vegar svo frá að hann hefði komið hingað til lands umrætt sinn þeirra erinda að fjarlægja tvo pakka af fíkniefnunum, samtals um eitt kíló að þyngd, úr bíl Pawels. Aðra aðkomu hefði hann ekki haft að málinu.

Lukasz kvaðst ekki þekkja Pawel og ekki hitt hann fyrr en hann kom til Íslands. Fundum þeirra hefði borið saman hér á landi fyrir milligöngu þriðja aðila, Leszek að nafni, sem búsettur væri í Póllandi. Sagði Lukasz Leszek hafa skipulagt innflutning fíkniefnanna.

Sjá einnig: Lögreglan hleraði grunaða fíkniefnasmyglara

Pawel neitaði í fyrstu sök en við aðalmeðferð málsins kvaðst hann hins vegar vilja játa innflutning á fíkniefnum til landsins frá Hollandi með þeim hætti sem væri lýst í ákæru að því undanskildu að hann sagðist einungis hafa vitað af einu kíló af fíkniefnum í bíl sínum. Hann sagðist ekki vita um magnið væri þrjú kíló og ekki vitað hvar efnin voru falin. Sagðist hann ekki mega upplýsa hver faldi efnin í bílnum.

Hann sagðist ekki þekkja Lukasz, þeir hefðu einungis verið í sambandi á netinu fyrr á þessu ári og ætla að koma hingað til lands í þeim tilgangi að leita sér vinnu.

Símanúmer sem skráð var á aðila að nafni Leszek í síma Pawels kvað Pawel vera símanúmer Lukaszar. Hann hafði fyrst kynnt sig fyrir Pawel sem Leszek.

Héraðsdómur Reykjaness taldi framburð þeirra óstöðugan og sannað væri að þeir hefðu staðið að innflutningi á tæpum þremur kílóum af MDMA, líkt og þeim var gefið að sök í ákæru.

Báðir voru þeir dæmdir til fjögurra ára fangelsisvistar en til frádráttar kemur gæsluvarðhald sem þeir hafa sætt frá 28. apríl 2017.