Lögreglan hleraði grunaða fíkniefnasmyglara

Lögreglan á höfuðborgarsvæðinu fékk heimild héraðsdóms Reykjaness til að koma fyrir eftirfararbúnaði og hljóðupptöku í bifreið og farsíma tveggja erlendra karlmanna sem ákærðir eru fyrir að hafa smyglað talsverðu magni af sterkum fíkniefnum til landsins í apríl síðastliðnum með ferjunni Norrænu. Þetta kemur fram í dómi Hæstaréttar sem staðfesti í gær áframhaldandi gæsluvarðhald yfir mönnunum tveimur allt til 7. september næstkomandi.

Mennirnir komu til landsins með Norrænu þann 25. apríl síðastliðinn. Bifreið mannanna vakti athygli lögreglu og tollvarða og var þá tekin til frekari skoðunar og vöknuðu grunsemdir um að í bílnum væru falin fíkniefni. Í framhaldinu fékk lögregla heimild til að koma fyrir eftirlitsbúnaði og hljóðupptöku í bílnum sem og í farsíma annars mannsins.

Bílnum hafi síðan verið fylgt eftir til Reykjavíkur og hafi henni verið ekið til Keflavíkur þar sem hinn ákærði einstaklingurinn í málinu hafi verið sóttur.

Þrjú kíló af mjög sterku MDMA

Hinn 27. apríl hafi þeir ekið í verslun, keypt þar topplyklasett, sexkanta, nælonhanska, skrúfjárn og vigt. Lögreglan telur að ætlunin hafi verið að nota þessi verkfæri til að ná fíkniefnunum úr bílnum.

Mennirnir voru handteknir síðdegis sama dag á gistiheimili með rúmlega eitt kíló af MDMA. Þegar þeir voru handteknir hafði annar ákærðu sett um helming efnanna inn á vasa á yfirhöfn sinni. Við leit í bílnum fundust um tvö kíló af MDMA í samskonar pakkningum og þau efni sem fundust í herbergi gistiheimilisins.

Samkvæmt niðurstöðu Rannsóknarstofu Háskóla Íslands í lyfja- og eiturefnafræði er um mjög sterkt efni að ræða, en styrkur fíkniefnisins MDMA í sýninu hafi verið 80-81%, sem samsvari 95-96% af MDMA-klóríði.

Mennirnir neita báðir sök í málinu. Þeir hafa verið ákærðir í málinu og setið í gæsluvarðhaldi frá 28. apríl.

Hægt er að lesa dóm Hæstaréttar í málinu hér og hér.

Mikið um fíkniefnasmygl það sem af er ári

Það sem af er ári hefur lögreglustjórinn á Suðurnesjum lagt hald á mikið magn fíkniefna og mun meira en á sama tíma á síðasta ári. öllum tilvikum hafa efnin fundist við tollleit á farþegum á leið um Flugstöð Leifs Eiríkssonar, ýmist í farangri eða innvortis.

Alls hefur hald verið lagt á 16203,48 gr. af kókaíni af mismunandi styrkleika og 1950 ml af fljótandi kókaíni. Samkvæmt mati rannsóknarstofu samsvarar magn fljótandi kókaínsins 4500 gr. af kókaíni í neyslustyrkleika.

Þá voru haldlagðir 700 ml af fljótandi amfetamíni sem samkvæmt mati rannsóknarstofu samsvara 6998 gr. af efninu í neyslustyrkleika. Loks var lagt hald á 196.5 gr. af metamfetamíni og 0.19 gr. af hassi.

Lögreglan á Suðurnesjum fer með rannsókn þessara mála. Um 20 sakamál er að ræða en sakborningar voru erlendir ríkisborgarar nánast í öllum tilvikum. Þeir hafa allir setið í gæsluvarðahaldi meðan á rannsókn og ákærumeðferð hefur staðið.