96 þúsund manns sáu sjaldgæfar 90 markalausar mínútur hjá Messi

Argentínumenn unnu 1-0 sigur á erkifjendum sínum frá Brasilíu í vináttulandsleik þjóðanna á krikket-leikvanginum í Melbourne í dag.

Jorge Sampaoli stýrði þarna landsliði Argentínu í fyrsta sinn og ekki slæmt að byrja á því að vinna Brasilíu.

Tæplega 96 þúsund manns (95569) sáu Lionel Messi spila 90 mínútur en Argentínumaðurinn náði þó ekki að skora mark í leiknum.

Eina markið skoraði bakvörðurinn Gabriel Mercado rétt fyrir hálfleik þegar hann fylgdi á eftir skalla Nicolas Otamendi í stöng. Angel Di Maria átti fyrirgjöfina eftir stutt horn. Gabriel Mercado spilar með Sevilla á Spáni en Otamendi er leikmaður Manchester City.

Gabriel Jesus, sóknarmaður Manchester City og brasilíska landsliðsins, fékk vel að finna fyrir því í leiknum og endaði á því að vera borinn af velli á börnum.

Gabriel Jesus fékk þó nokkur færi til að skora þar á meðal átti hann stangarskot eftir rúmlega klukkutíma leik. Sergio Romero, markvörður Manchester United og argentínska landsliðsins stoppaði hinsvegar allt sem á markið kom.

Lionel Messi var einn af fimm leikmönnum Argentínu sem spiluðu allar 90 mínúturnar en félagar hans í framlínunni, Juventus-mennirnir Gonzalo Higuaín og Paulo Dybala, voru hinsvegarr báðir teknir af velli.