Stjórnarformaður Toshiba segir af sér vegna milljarða taps fyrirtækisins

Stjórnarformaður japanska stórfyrirtækisins Toshiba hefur sagt af sér í kjölfar milljarða taps. Lækka þurfti bókfært virði eigna fyrirtækisins í kjarnorkustarfsemi þess í Bandaríkjunum um 6,3 billjónir dala en á níu mánaða tímabili í fyrra, frá apríl til desember, tapaði Toshiba 4,4 billjónum dala.

 

Shigenori Shiga, stjórnarformaður fyrirtækisins, ákvað því að segja af sér og taka ábyrgð á vandræðum Toshiba en verð á hlutabréfum þess féll um 10 prósent í dag eftir að fyrirtækið náði ekki að gefa upp hagnað sinn og tekjur innan þess tímaramma sem það hafði sett sér.

Fyrst var varað við því í desember síðastliðnum að afkoma fyrirtækisins gæti orðið slæm en tölurnar sem kynntar voru í dag eru verri en búist var við að því er fram kemur í frétt CNN Money.

Þá fara áhyggjur vaxandi af mögulegu gjaldþroti fyrirtækisins vegna bágrar fjárhagsstöðu að því er asískir fjölmiðlar greina frá en fyrirtækið hefur neitað að tjá sig um orðróm þess efnis.

Toshiba var stofnað árið 1938. Almenningur þekkir fyrirtækið eflaust helst sem raftækjaframleiðanda þar sem það framleiðir meðal annars tölvur og sjónvörp.