Fresta sölu Landsbankans vegna kosninga í haust

Fyrirhugað söluferli á eignarhlutum ríkisins í Landsbankanum verður endurskoðað af Bankasýslu ríkisins í samráði við stjórnvöld og Alþingi. Í tilkynningu frá Bankasýslunni segir að breytingar hafi orðið á aðstæðum frá því að óskað var eftir mögulegum ráðgjöfum við söluna, og er þar átt við að Alþingiskosningum verður flýtt.

„Telur stofnunin því rétt að fresta um ótilgreindan tíma ákvörðun um ráðningu ráðgjafa vegna söluferlisins,“ segir í tilkynningunni. Bankasýslan segir ljóst að söluferlið verði ekki eins og lagt var upp með í byrjun.

Ríkissjóður á nú 98 prósenta eignarhlut í Landsbankanum en samkvæmt fjárlögum ársins er heimild fyrir sölu á allt að þrjátíu prósenta hlut á þessu ári.