Hagnaðist um 58 milljónir og greiddi 67 í arð

Þar segir að launagreiðslur félagsins hafi numið 13,4 milljónum króna árið 2025 og fjöldi ársverka hafi verið eitt. Einnig var greiddur út 66,5 milljóna króna arður í fyrra en enginn arður var tekinn út árið á undan. Árni Páll fer með allt eignarhald í félaginu.

Hagnaður félagsins dregst saman milli ára en hann nam 66,2 milljónum króna árið 2024. Jafngildir áðurnefnd arðgreiðsla því rétt rúmlega öllum hagnaði ársins á undan. Rekstrartekjur drógust einnig saman og fóru úr 145,7 milljónum árið 2024 í áðurnefndar 125,4 milljónir ári seinna.

Festi kaup á bifreið og veitti 43,5 milljóna króna lán

Bifreið bættist við efnahagsreikning félagsins í fyrra og er hún verðmetin á tæpar 10 milljónir króna í ársreikningi. Annars staðar er gerð grein fyrir kaupum á fastafjármunum fyrir 11 milljónir króna sem er að líkindum kaupverð umræddrar bifreiðar.

Einnig bættist við lán til tengdra aðila upp á um 43,5 milljónir króna sem var ekki skráð árið 2024. Samhliða er gerð grein fyrir fyrirfram innheimtum tekjum upp á 36 milljónir króna og nýrri langtímaskuld hjá lánastofnun upp á tæpar 8,6 milljónir króna.

Til samanburðar voru engar langtímaskuldir eða fyrirfram innheimtar tekjur skráðar á efnahagsreikning félagsins árið 2024 og aukast skuldir og skuldbindingar því umtalsvert milli ára. Handbært fé Kópbois ehf. lækkaði úr 71,4 milljónum í 47,1 milljón króna á síðasta ári.

Áætla heildartekjur upp á tæpar 89 milljónir

Heimildin áætlaði í tekjublaði sínu að heildartekjur Herra Hnetusmjörs hefðu numið 88.756.630 krónum í fyrra. Þar af hefði hann verið með 74.230.555 krónur í fjármagnstekjur en til þeirra telst meðal annars hagnaður greiddur úr einkahlutafélögum. 

Tölur Heimildarinnar eru byggðar á gögnum Skattsins og reiknaðar út frá greiddu útsvari og fjármagnstekjuskatti.