Facebook hagnaðist um 480 milljarða króna í fyrra

Tekjur Facebook allt árið 2015 jukust um 44 prósent á milli ára og voru 17,93 milljarðar dala, eða um 2.300 milljarðar króna. Hagnaður Facebook í fyrra var 3,69 milljarðar dala eða um 480 milljarðar króna. Hagnaður fyrirtækisins er langt umfram væntingar sérfræðinga.

Þetta kemur fram í uppgjörstölum Facebook fyrir fjórða ársfjórðung síðasta árs.

„2015 var frábært ár fyrir Facebook. Samfélag okkar hélt áfram að stækka og efnahagur okkar þrífst vel. Við héldum áfram að fjárfesta í leiðum til að þjóna samfélagi okkar betur, að stækka viðskiptasvið okkar og að tengja saman heiminn,“ sagði Mark Zuckerberg, stofnandi og forstjóri Facebook.

Þrátt fyrir reglulegar spár um að ungt fólk sé að forðast Facebook og að notendum hljóti að fara að fækka virðist það ekki gerast.

Mark Zuckerberg birti í gær yfirlit yfir notendafjölda samfélagsmiðla Facebook og eru virkir notendur Facebook í mánuði hverjum nú 1,59 milljarðar. 900 milljónir nota Whats App, 800 milljónir nota Messenger og 400 milljónir nota Instagram.

We just announced our quarterly results and shared an update on our community's progress to connect the world. Our...

Posted by Mark Zuckerberg on Wednesday, January 27, 2016