Kokteilar til styrktar hjálparstarfi

„Auðvitað gripum við gæsina strax, enda spennandi að geta verið með í að styrkja góð málefni,“ segir Sigrún Hauksdóttir, veitingastjóri hjá Mar Bar sem er fyrsti og eini íslenski barinn sem tekur þátt í Negroni-vikunni, sem fer nú fram um allan heim.

Er Negroni-vikan sérstakt átak þar sem góðgerðarmál eru í hávegum höfð og blandast saman gleði og góðverk, þar sem ágóði kokteilsins rennur til góðgerðarmála um allan heim.

Velur hver bar sitt góðgerðarfélag og mun ágóðinn sem safnast í þessari viku hjá Mar Bar renna til neyðaraðgerða í Nepal á vegum UNICEF.

„Fimm hundruð krónur af hverjum drykk renna beinustu leið í söfnunina, og við erum mjög bjartsýn á að þetta eigi eftir að skila góðum árangri, sér í lagi þar sem Negroni-vikan hittir á sjómannahelgina,“ útskýrir Sigrún.

Verður því mikið húllumhæ á Mar Bar, en hann stendur við gömlu höfnina í Reykjavík, þar sem sjómannahelginni verða gerð góð skil.

Negroni-vikan er haldin hátíðleg á börum um heim allan og er þetta í þriðja skiptið sem það er gert. Umboðsaðili Campari á Íslandi stökk á vagninn í ár, og segir Atli Hergeirsson, sölustjóri hjá K. Karlssyni, að þátttakan sé komin til að vera. „Við byrjum á einum bar og svo vindur þetta væntanlega upp á sig, þetta er mjög skemmtilegt verkefni,“ segir Atli. Í fyrra tóku um þrettán hundruð barir þátt í vikunni og söfnuðu meira en sextán milljónum en hver bar velur sitt góðgerðarfélag sem fær ágóðann. Nafn vikunnar er dregið af Negroni-kokteilnum, þar sem Campari gegnir undirstöðuatriði en Campari stendur einmitt fyrir þessari alþjóðlegu viku.

„Þetta er haldið í þriðja skipti um heim allan, en í fyrsta skipti á Íslandi í ár. Í fyrra tóku yfir þrettán hundruð barir um allan heim þátt og söfnuðu meira en sextán milljónum króna á þessu vikutímabili,“ útskýrir Atli vongóður um framhaldið.