Komst á­fram fyrst ís­lenskra kvenna á vængjum fjall­konunnar

Hún keppti í Evrópukeppninni í dag ásamt Marlís Jónu Þórunn Karlsdóttur, aðstoðarkonu sinni, og lentu þær í tíunda sæti.

Aðalkeppnin fer fram í Lyon í Frakklandi í janúar á næsta ári. Snædís og Marlís voru búnar að vera að frá því snemma í morgun og var niðurstaðan ljós á sjötta tímanum. Danir lentu í fyrsta sæti, Noregur í öðru og Ítalir í því þriðja. Tíu efstu löndin komust inn í aðalkeppnina.

Rætt var við Snædísi á Vísi um helgina um keppnina en hún sagði þátttöku langþráðan draum. Þar sagði hún þemað allsráðandi í seinni disknum þar sem hún notar silfurvírvirki sem notað er í íslenskum þjóðbúningi kvenna.

Umfangsmesti réttur teymisins var nefndur She wears the sea in silver eða Hún klæðist hafinu í silfri.

„Óður til okkar fallega þjóðbúnings, sem er þekktur fyrir sitt íburðarmikla silfurskraut.

Pönnusteiktur urriði fylltur með humar- og urriðafarsi, með tómötum og fínlegu kryddjurtalagi. Borið fram með ætiþistilsgimsteini fylltum með ætiþistilssultu og krýndur með ube-flögu.

Kjúklingabaunapanisse, fyllt með piparrótarskyri, fenniku og grænu epli, toppað með íslensku hnúðkáli og kjúklingabaunum.

Klárað með Vin Jaune-sósu úr urriða og ígulkeri.“ Svona er réttinum lýst á Facebook-síðu íslenska liðsins. 

Fréttin er í vinnslu.