Hvernig má draga úr hættu á tjóni í fárviðrinu?

Töluverð hætta er á að tjón verði í því ofsaveðri sem mun ganga yfir landið í dag og í kvöld. Ofan á það mikla hvassviðri sem spáð er mun talsverð úrkoma fylgja í kvöld og í nótt og því skapast töluverð hætta á að flæða taki inn í hús.

Ýmislegt er hægt að gera til þess að fyrirbyggja tjón af völdum veðursins en fréttastofa 365 fór yfir fyrirbyggjandi agðerðir með Methúsalemi Hilmarssyni, forstöðumanni forvarna hjá TM líkt og sjá má hér fyrir ofan.

Ganga frá lausamunum

Spáð er miklu hvassviðri í dag og í nótt, svo miklu að sjaldan hefur annað sést síðan mælingar hófust. Því er mikilvægt að ganga tryggilega frá lausamunum svo að þeir skapi ekki hættu.

„Fólk þarf að varast það ef það er eitthvað að lausum munum í kringum húsnæði sitt líkt, tjaldvagnar eða hjólhýsi eða annað lauslegt, þarf að fyrirbyggja það með einhverjum hætti.“

Moka og hreinsa frá öllum niðurföllum

Eftir snjókomu síðastliðnar vikur er víða að finna mikinn snjó á svölum. Þegar fer að hlána þarf þessi snjór að leita eitthvað og líkur eru á því að hann flæði inn í hýbýli.

„Það getur verið mikil snjósöfnun á svölum og víðsvegar eru þær steyptar allan hringinn. Þegar það kemur mikil úrkoma og hláka geta svalir breyst í vatnspott. Eitthvað þarf vatnið að fara og oftar en ekki leitar það inn um svalahurðir.“

Methúsalem biður fólk að huga vel að öllum niðurföllum og ganga úr skugga um það að búið sé að hreinsa frá sem flestum svo að vatnið leiti eitthvað annað en inn í hýbýli. Þetta á sérstaklega við um ef það er kjallari við hýbýli fólks.

„Síðast ekki síst að ef það er kjallari við húsið þarf að moka frá öllum niðurföllum. Það er mikilvægt að reyna að losa klaka og snjó frá öllum niðurföllum í kringum hús.

Passa sig á grýlukertum og snjó sem fellur af þökum

Talsverð úrkoma mun fylgja hvassviðrinu sem gæti skapað ýmisleg vandræði og talsverða hættu á tjóni. Mikilvægt er að passa sig á því að ganga ekki nærri húsum þar sem greinilega má sjá grýlukerti á þakskeggjum, enda gætu þau fallið niður og skapað hættu.

„Þegar fer að hlána geta grýlukerti á húsum og fólk þarf að vera á varðbergi varðandi það og passa sig þegar það er á gangi nálægt húsum, sérstaklega fjölbýlishúsum og öðrum háum húsum.“

Það hefur snjóað mikið víðsvegar um land undanfarnar vikur og víða er mikill snjór, bæði á þökum og svölum húsa. Þegar snjórinn sem safnast hefur saman á þökum húsa blotnar og getur það skapað mikla hættu.

„Þegar vatnið kemst í snóinn á þökunum getur snjórinn farið niður í heilum flekum. Einnig er mikilvægt að leggja ekki bílum nálægt slíkum húsum því að þeir geta orðið fyrir stórtjóni verði þeir fyrir grýlukertum eða flekum.“

Mikilvægt að taka allar viðvaranir Almannavarna alvarlega

Búist er við að fárviðrið dreifi sér mjög hratt um landið eftir hádegi og bendir Elín Björk Jónasdóttir veðurfræðingur á að um klukkan sjö í kvöld verði skollið aftakaveður um allt land og þá sé oft seint að koma sér í skjól. Það sé því mikilvægt að taka allar viðvaranir Almannanvarna alvarlega.

Hlaða síma, vera með útvarp og batterí.

Einnig er gott að hafa í huga þessi almennu ráð sem Viðar Garðarsson benti á á Facebook-síðu sinni. Gott er að að hafa vasaljós og kerti til staðar, útvarp sem gengur fyrir rafhlöðum og hafa GSM-síma fullhlaðna ef ske kynni að rafmagn fari af.

Á morgun er spáð versta veðri sem við fullorðna fólkið höfum séð síðan 1991. Mörg okkar voru á barnsaldri þegar ofsaveð...

Posted by Viðar Arason on Sunday, 6 December 2015