„Fall er fararheill“

Úrslit urðu óvænt í móti í skeiðgreinum í Meistaradeildinni í hestaíþróttum sem fram fór í Víðidalnum um liðna helgi.

Þegar Íslandsmeistarinn í 150 m skeiði, Teitur Árnason, ætlaði að leggja allt undir í síðari spretti, rann hestur hans, Tumi frá Borgarhóli, í startbásnum og datt. Var draumurinn um gull í greininni þar með úti, því Sigurbjörn Bárðarson á Fróða frá Laugabóli hafði þá þegar farið 150 metrana á 14,79 sekúndum sem reyndist vera besti tíminn.

„Fall er fararheill,“ sagði Teitur eftir byltuna afdrifaríku og lét deigan ekki síga. Reyndist Teitur sannspár, því hann gerði sér lítið fyrir og hirti efsta sætið af Gullbirninum í gæðingaskeiðinu, sem var síðari keppnisgreinin, með einkunnina 7,75.

Myndbandið sýnir spretti knapanna sem voru í þremur efstu sætum í 150 m skeiði og gæðingaskeiði, og byltuna afdrifaríku. 

Úrslit 150 metra skeið
Röð	Knapi	Hestur		Fyrri sprettur	Seinni sprettur	Betri tíminn
1	Sigurbjörn Bárðarson	Fróði frá Laugabóli		1000	14,79	14,79
2	Bjarni Bjarnason	Hera frá Þórodddsstöðum		14,84	1000	14,84
3	Teitur Árnason	Tumi frá Borgarhóli		14,94	1000	14,94
4	Guðmundur Björgvinsson	Gjálp frá Ytra-Dalsgerði		15,78	15,02	15,02
5	Guðmar Þór Pétursson	Ör frá Eyri		1000	15,03	15,03

Úrslit gæðingaskeið

1. Teitur Árnason, Tumi frá Borgarhóli, 7,75  

2. Sigurbjörn Bárðarson, Flosi frá Keldudal, 7,71  

3. Árni Björn Pálsson, Korka frá Steinnesi, 7,54  

4. Bergur Jónsson, Flugnir frá Ketilsstöðum, 7,42  

5. Davíð Jónsson, Irpa frá Borgarnesi, 7,38