Innlent

Þorsteinn Hjaltested ekki eini réttmæti erfingi Vatnsendajarðarinnar

Sunna Kristín Hilmarsdóttir skrifar
Hæstiréttur felldi úr gildi dóm héraðsdóms vegna Vatnsenda í Kópavogi.
Hæstiréttur felldi úr gildi dóm héraðsdóms vegna Vatnsenda í Kópavogi. Vísir/Valli
Hæstiréttur hefur fellt úr gildi dóm Héraðsdóms Reykjaness þess efnis að Þorsteinn Hjaltested sé réttmætur eigandi Vatnsendajarðarinnar.

Héraðsdómur hafði áður staðfest skipti á búi Sigurðar Hjaltested sem kváðu á um að Þorsteinn væri eini réttmæti erfingi jarðarinnar.

Skiptastjóri taldi sig ekki geta farið gegn erfðaskrá sem gerð var árið 1938 og kvað meðal annars á um að jörðin skyldi erfast í beinan karllegg, ekki mætti selja hana og þar þyrfti ávallt að halda bú.

Samkvæmt erfðaskránni var Þorsteinn erfingi jarðarinnar en Hæstiréttur metur það sem svo að ómögulegt sé að framkvæma erfðaskrána.

Því beri að ráðstafa beinum eignarréttindum jarðarinnar til lögerfingja Sigurðar Hjaltested eftir almennum reglum I. kafla erfðalaga nr. 8/1962. Þorsteinn er í raun einn þeirra, auk fjórtán annarra.

Milljarðar eru í húfi en Þorsteinn Hjaltested hefur fengið gríðarlega háar bætur greiddar frá Kópavogsbæ vegna þess að bærinn hefur tekið hluta jarðarinnar eignarnámi undir byggingarland.

Upphaflegur eigandi jarðarinnar var Magnús Einarsson Hjaltested. Hann eignaðist jörðina árið 1914 en var ókvæntur og barnlaus.

Það fór því svo að barnabarn bróður hans, Sigurður Kristján Lárusson Hjaltested, erfði Vatnsendajörðina og hóf þar búskap árið 1958 með seinni konu sinni.

Sigurður lést árið 1966. Þá fór sonur hans af fyrra hjónabandi, Magnús Hjaltested, fram á að fá jörðina. Sú krafa leiddi til málaferla sem enduðu með því að ekkja Sigurðar þurfti að flytja af jörðinni.

Þegar Magnús lést svo árið 1999 tók Þorsteinn Hjaltested, elsti sonur hans, við jörðinni. Málaferli þau sem nú hafa verið leidd til lykta hófust árið 2007 og hafa því staðið í 8 ár. Málinu er þó í raun ekki lokið þar sem skipta þarf búi Sigurðar Hjaltested frá árinu 1966 aftur.

Dóm Hæstaréttar má nálgast hér.
Deilur um Vatnsendaland Kópavogur Dómsmál

Mest lesið


Fleiri fréttir

Sjá meira


×

Mest lesið