"Ég á mér helst þann draum að komast í betra húsnæði fyrir mig og stelpuna mína“

Fyrsti undanúrslitaþátturinn af Ísland Got Talent verður sýndur í opinni dagskrá á Stöð 2 á sunnudagskvöldið. Sjö atriði af ýmsum toga keppa um atkvæði þjóðarinnar til að eiga möguleika á að komast í úrslitaþáttinn og vinna tíu milljónir króna. 

Alexander Aron er einn af keppendunum en hann syngur og spilar á gítar. Við kynntumst honum aðeins betur.

Fullt nafn: Alexander Aron Guðbjartsson

Aldur: 34

Starf: Einkaþjálfari í World Class og við tónlist 

Símnúmer til að kjósa hann í Ísland Got Talent: 900-9503

Af hverju á fólk að kjósa þig?

Ég get ekki sagt að ég eigi það eitthvað frekar skilið en aðrir keppendur þar sem það eru svo margir rosalega hæfileikaríkir í þessari keppni. Ég held að það eina sem gefi mér sérstöðu í keppninni er að ég sem bæði lögin og textana sem ég flyt, þannig ég vona bara að allir kjósi mig, sem líst vel á mig. Annað get ég ekki beðið um. 

Hver er draumurinn? 

Ég á mér helst þann draum að komast í betra húsnæði fyrir mig og stelpuna mína, komast af leigumarkaðnum sem er auðvitað hrikalegur, það væri æðislegt að geta keypt sér snyrtilega og góða íbúð. Það myndi skapa meira öryggi og létta á fjárhagnum. Tengt tónlist dreymir mig um að halda reglulega tónleika þar sem ég myndi flytja mína tónlist og það væri mikill plús ef maður gæti framfleytt sér líka að stórum hluta á tónlistinni. 

Hvaða lag tekurðu í karókí? 

Hef aðeins tvisvar farið í karókí um ævina en þá tók ég Stairway to Heaven.