Skólastarf hefst í Newtown á ný

Skólastarf  í Newtown hefst á ný í dag, fjórum dögum eftir að fjöldamorðinginn Adam Lanza skaut 26 nemendur og starfsmenn skólans til bana í grunnskólanum Sandy Hook.

Rannsókn lögreglu á atburðum síðastliðins föstudags stendur þó enn yfir og því verður kennsla með óhefðbundnum hætti víðast hvar í Connecticut. Lögreglumenn og sálfræðingar verða í skólunum næstu daga og munu þeir ræða við nemendur um voðaverkin sem kostuðu 20 nemendur lífið.

Aðstandendur og aðrir íbúar í Newtown hafa heiðrað minningu fórnarlambanna með því að raða 26 jólatrjám við skólann.

Fjöldamorðið í Sandy Hook er eitt það allra versta í sögu Bandaríkjanna og hefur umræðan um hertari vopnalöggjöf í landinu náð nýjum hæðum í kjölfar þess.

Ódæðismaðurinn, hinn tvítugi Adam Lanza, var vopnaður þremur byssum, þar á meðal hálfsjálfvirkum riffli.

Alls eru 4.700 nemendur í Newtown og munu þeir snúa aftur í kennslustofurnar í dag.