Zlatan semur við PSG

Sky Sport Italia greinir frá því að Zlatan Ibrahimovic hafi samþykkt að ganga til liðs við Paris Saint-Germain. Samningurinn, sem er til þriggja ára, er talinn vera 39 milljóna evra virði eða sem nemur um sex milljörðum íslenskra króna.

Umboðsmaður framherjans þrítuga hefur verið í viðtæðum við PSG síðan um miðja síðustu viku. Þá samþykkti AC Milan tilboð Parísarliðsins í Svíann og Thiago Silva upp á 62 milljónir evra eða sem nemur tæpum tíu milljörðum króna.

Silva hefur þegar gengið frá samningi við PSG og samkvæmt frétt Sky Sport Italia verður Ibrahimovic kynntur sem leikmaður franska félagsins á morgun.

Þá er einnig reiknað með því að Marco Verratti, leikmaður Pescara, verði kynntur til sögunnar sem liðsmaður franska félagsins á morgun.