Frumlegir Færeyingar

Færeysku fyrirtækin sem skráð eru á markað í Kauphöllina hér héldu fjárfestaþing í gær þar sem þau kynntu starfsemi sína og afkomu upp á síðkastið. Þingið var vel sótt og góður rómur gerður að því.

Upplýsingamappa með gögnum um færeysku fyrirtækin sló sérstaklega í gegn. Eins og flestir vita eru upplýsingamöppur fremur sterílar og leiðinlegar, yfirleitt úr plasti eða leðri og enda oftar en ekki undir haug af rusli áður en Sorpa tekur við. Þessi var hins vegar handgerð úr ull eftir færeyska handverkskonu.

Vægt til orða tekið var þetta snilldarverk, sem sjaldan ef nokkurn tíma hefur sést á kynningarfundum hér á landi.