Verður án ráðherralauna út árið

Ögmundur Jónasson segist ekki ætla að þiggja ráðherralaun að loknum kosningum fari svo að hann verði skipaður heilbrigðisráðherra að nýju. Hann segir að þegar hann hafi tekið sæti heilbrigðisráðherra hafi hann skrifað fjármáladeild Stjórnarráðsins og farið fram á að hann fengi ekki greidd ráðherralaun út árið 2009 að minnsta kosti.

Ögmundur segir að þessi ákvörðun sín sé í samræmi við þær niðurskurðarkröfur sem hafi verið gerðar í heilbrigðismálum á þessu ári. Hann segist ekki hafa tekið ákvörðun um það hvort hann hyggist þiggja ráðherralaun eftir áramót fari svo að hann sitji í embætti heilbrigðisráðherra þá.