Þrír leikir í úrslitakeppni NBA í kvöld

Utah Jazz, LA Lakers og Orlando Magic standa öll frammi fyrir erfiðu verkefni í kvöld þegar þau mæta andstæðingum sínum í þriðja sinn í úrslitakeppninni í NBA. Leikur Utah og Houston verður sýndur beint á NBA TV klukkan eitt í nótt, en öll þrjú liðin eru undir 2-0 í einvígjum sínum eftir tap á útivöllum í fyrstu tveimur leikjunum.

Fyrstu tveir leikir Utah og Houston voru mjög jafnir og harðir en heimamenn höfðu þar naumlega betur. Utah-liðið réði illa við þá Yao Ming og Tracy McGrady, en Houston náði að vinna báða heimaleiki sína þrátt fyrir skelfilega skotnýtingu. Utah vonast til að snúa blaðinu við í kvöld, en til þess þarf liðið að rita nýja kafla í sögu sína.

Liðið hefur aldrei náð að vinna úrslitaseríu eftir að hafa lent undir 2-0, en Utah getur þó huggað sig við þá staðreynd að liðið er með frábæran árangur í þriðja leik á heimavelli í úrslitakeppni. Liðið hefur unnið 15 af 17 þeim í gegn um tíðina. Utah hefur 9 sinnum lent undir 2-0 í einvígi í úrslitakeppni - tvisvar hefur liðið náð að jafna 2-2, en yfirleitt hefur það verið fjórði leikurinn sem hefur reynst banabitinn í þeirri stöðu sem það er nú.

LA Lakers tekur á móti Phoenix Suns á heimavelli sínum í kvöld þar sem Phoenix hefur sigrað í fyrstu tveimur leikjunum. Phil Jackson þjálfari Lakers sagðist hafa verið auðmýktur og þunglyndur eftir stórt tap í síðasta leik og sagði í samtali við LA Times að hann þyrfti ef til vill að reyna að finna leið til að geta notað Kobe Bryant í 48 mínútur til að eiga möguleika í einvíginu. Sagan er ekki beinlínis á bandi Lakers í kvöld því í þeim 193 úrslitaseríum í NBA þar sem lið hafa lent undir 2-0 í sjö leikja seríum - hafa aðeins 11 þeirra komist áfram.

Loks tekur Orlando á móti Detroit á heimavelli eftir tvö töp í Detroit, en þar á bæ er ekki reiknað með sérlega spennandi einvígi þar sem Detroit hefur verið mun sterkara í fyrstu tveimur leikjunum. Lið Detroit hefur verið fastagestur í úrslitum Austurdeildar undanfarin ár og margir tippa á að liðið sé eitt þeirra sem menn eru að gleyma þegar talað er um sigurstranglegustu liðin úrslitunum í ár.