10 leikmenn Arsenal lögðu Blackburn

Leikmenn Arsenal sýndu mikinn karakter með því að leggja Blackburn af velli á útivelli í kvöldleik ensku úrvalsdeildarinnar, 2-0. Gilberto Silva var vikið af leikvelli strax á 12. mínútu leiksins en þrátt fyrir að vera manni fleiri átti Blackburn ekki roð í fríska leikmenn Arsenal. Kolo Toure og Thierry Henry skoruðu mörk Arsenal.

Toure skoraði með skalla á 36. mínútu eftir nákvæma sendingu frá Henry úr aukaspyrnu. Það var síðan Henry sjálfur sem innsiglaði sigurinn þegar um 20 mínútur voru eftir. Þá skoraði hann stórkostlegt mark úr einstaklega vel útfærðri skyndisókn Arsenal.

Sigurinn kemur Arsenal upp í fjórða sæti deildarinnar með 42 stig, einu stigi minna en Liverpool sem er í þriðja sæti.