Brassar lögðu Svisslendinga

Brasilíumenn lögðu Svisslendinga 2-1 í vináttuleik í knattspyrnu í kvöld. Varnarmaðurinn Luisao frá Benfica kom Brössum yfir á 22. mínútu og fyrirliðinn Kaka hjá AC Milan breytti stöðunni í 2-0 aðeins 12 mínútum síðar. Alexandre Frei minnkaði muninn fyrir Svisslendinga á 70. mínútu, þó markið hafi reyndar verið skráð sem sjálfsmark á Maicon, en lengra komust þeir ekki þrátt fyrir ágæt tilþrif í lokin.

Nokkrir aðrir vináttuleikir fóru fram í kvöld. Fílabeinsstrendingar lögðu Svía 1-0 með marki frá hinum eldheita Didier Drogba, Georgíumenn lögðu Ungverja 2-0 með tveimur mörkum frá Kobiashvili. Slóvakar lögðu Búlgara 3-1 á heimavelli, Eistar lögðu Hvít-Rússa 2-1 þar sem Oper skoraði tvö mörk fyrir Eista og Litháar lögðu Maltverja 4-1 á útivelli.