Við erum miklu betri en Chelsea

Victor Valdes hefur nú sent liðsmönnum Chelsea góða ögrun fyrir stórleik liðanna á Stamford Bridge í Meistaradeildinni í kvöld, en markvörðurinn ungi sagði Sky sjónvarpsstöðinni í dag að Barcelona væri einfaldlega betra lið en Chelsea.

"Ég óttast alls ekki að mæta Chelsea, því við höfum sýnt að við erum með betra lið og spilum einfaldlega betri knattspyrnu en Chelsea. Það er bara staðreynd. Þessir leikir okkar nú koma auðvitað dálítið snemma í keppninni og ég held að flestir reikni með að þessi lið fari bæði áfram upp úr riðlinum, en ég hefði frekar viljað mæta þeim seinna í keppninni. Leikmenn Chelsea eru mjög taugaóstyrkir þegar þeir mæta okkur og pressan á þeim frá stjóranum verður líkt og hér sé um sjálfan úrslitaleikinn að ræða. Mér sýnist Mourinho vera efst í huga að vinna Barcelona frekar en önnur lið," sagði Valdes.