Everton valtaði yfir Liverpool

Rauðklæddu gestirnir úr Liverpool áttu aldrei möguleika gegn frískum leikmönnum Everton í hádegisleik enska boltans. Lokatölur urðu 3-0, Everton í vil.

Tim Cahill og Andy Johnson höfðu skorað fyrir Everton á heimavelli sínum í fyrri hálfleik og það var síðan markahrókurinn Johnson sem bætti við þriðja markinu í viðbótartíma í þeim síðari og sannfærandi 3-0 sigur því staðreynd.

Svo virtist sem að landsleikjatörn liðinnar viku hefði verið að hrjá leikmenn Liverpool því þeir virkuðu þreyttir og náðu sér aldrei á strik. Það sama verður ekki sagt um leikmenn Everton, sem spiluðu eins og englar lengst af og uppskáru eftir því.