Tevez og Mascherano til West Ham

Í kvöld rennur út frestur liða í Evrópu til að ganga frá félagaskiptum og segja má að Lundúnalið West Ham hafi stolið fyrirsögnunum í dag, en fullyrt er að argentínsku leikmennirnir Carlos Teves og Javier Mascherano hjá Corinthians séu við það að ganga í raðir félagsins.

Þetta verða að teljast nokkuð óvænt tíðindi, en Tevez hefur til að mynda verið orðaður við mörg af stórliðum Evrópu og talið var að Manchester United og Arsenal væru á höttunum eftir honum. Þeir félagar eru báðir í argentínska landsliðinu og því er haldið fram að West Ham hafi náð samningum við fyrirtækið Media Sport Investments, sem á réttinn á leikmönnunum. Tevez segir sjálfur á heimasíðu sinni að þeir félagar séu þegar gengnir í raðir West Ham.