Al Harrington loksins til Indiana

Framherjinn Al Harrington er loksins genginn í raðir Indiana Pacers frá Atlanta Hawks í NBA deildinni. Félögin hafa þráttað við samningaborðið í allt sumar en í dag varð loks ljóst að Harrington gengi aftur til liðs við félagið sem tók hann í nýliðavalinu árið 1998. Harrington er 26 ára gamall og skoraði 18 stig og hirti 7 fráköst að meðaltali með Atlanta Hawks í fyrra.

Harrington er frá Indiana og sagðist ánægður að vera kominn aftur á heimaslóðirnar, en lið Atlanta fær ansi lítið í staðinn fyrir þennan skemmtilega framherja því samningur hans var í þann mund að renna út.