Rooney röflar stöðugt í mér

Sir Alex Ferguson segir að vel komi til greina að hann leyfi framherjanum Wayne Rooney að spila æfingaleik með Manchester United á mánudaginn kemur, því leikmaðurinn tuði sífellt í sér um að fá að spila.

Rooney er fyrir stuttu kominn aftur í herbúðir United eftir að hafa fengið góða hvíld eins og aðrir leikmenn sem tóku þátt í HM í sumar, en greinilegt er að keppnisskapið í Rooney er strax farið að kitla hinn skapmikla framherja.

"Ég ætlaði nú ekkert að láta hann spila strax, en hann röflar stöðugt í mér um að fá að spila svo ég neyðist líklega til að láta það eftir honum," sagði Alex Ferguson.