Vill marka djúp spor í söguna

Portúgalski knattspyrnustjórinn Jose Mourinho hjá Chelsea segist vilja marka djúp spor í enska knattspyrnusögu áður en hann lætur af störfum og stefnir á að vinna þrjá til fjóra titla á Englandi á næstu fimm árum.

"Ég er hungraður í góðan árangur fyrir mig og fyrir Chelsea. Ég vil að mín og Chelsea verði minnst fyrir að gera frábæra hluti þegar fólk lítur aftur í söguna eftir nokkra áratugi. Við höfum þegar unnið tvo titla og erum með því búnir að skapa okkur stærri sess en til að mynda Blackburn sem vann einu sinni fyrir nokkrum árum," sagði Mourinho, sem segist alltaf vera að hugsa um framtíðina.