Vieira hefði aldrei átt að fara frá Arsenal

Framherjinn Dennis Bergkamp sem lék kveðjuleik sinn með Arsenal á nýja Emirates vellinum um síðustu helgi, sagði í samtali við breska blaðið Sun að Patrick Vieira hefði aldrei átt að fara frá Arsenal. Vieira er nú talinn vera á leið til Inter Milan, en Bergkamp segist hafa fundið fyrir því um helgina að sá franski ætti enn stóran hlut í hjörtum stuðningsmanna Arsenal.

"Arsenal er með lið sem sannarlega getur keppt um alla þá titla sem í boði eru, svo ég sé ekki af hverju menn ættu að leita annað. Ég held að menn séu farnir að gera sér grein fyrir þessu núna og þess vegna er ég svo feginn að Thierry Henry ákvað að vera áfram. Ég held að ekki færri en 56 manns hafi stöðvað mig um helgina og sagt mér að Patrick Vieira ætti að koma aftur til Arsenal og ég vona sannarlega að hann geri það," sagði Bergkamp, sem safnaði rúmlega 1,5 milljónum punda í kveðjuleiknum um helgina og ætlar að gefa hverja krónu til líknarmála.