Zidane fékk gullknöttinn

Frakkinn Zinedine Zidane fékk í gær gullknöttinn á HM, en það eru verðlaunin sem afhent eru besta leikmanni mótsins hverju sinni. Það eru blaðamenn sem standa að valinu og hlaut Zidane flest atkvæði, Fabio Cannavaro varð annar og Andrea Pirlo þriðji. Þess má geta að atkvæðin voru flest komin í hús í hálfleik úrslitaleiksins i gær og því hafði árás Zidane á Marco Materazzi lítil áhrif á útkomuna.

Miroslav Klose hjá Þýskalandi fékk gullskóinn fyrir að verða markahæsti leikmaður keppninnar, Gianluigi Buffon hjá Ítalíu var kjörinn besti markvörðurinn, Lukas Podolski hjá Þýskalandi var kjörinn besti ungi leikmaðurinn og þá var lið Portúgal valið skemmtilegasta lið keppninnar.