Ætlar að fara frá Manchester United

Portúgalski vængmaðurinn Cristiano Ronaldo hefur gefið það afdráttarlaust út að hann ætli að fara frá Manchester United og ganga til liðs við Barcelona eða Real Madrid á Spáni. Ronaldo er ekki sáttur við að hafa ekki fengið meiri stuðning úr herbúðum Manchester United í kjölfar þeirrar gagnrýni sem hann hefur orðið fyrir eftir leik Englendinga og Portúgala á HM.

"Það besta í stöðunni fyrir mig er að fara frá Manchester United. Ég hef ekki fengið þann stuðning sem ég átti von á að fá frá stjórnarformanninum og knattspyrnustjóranum - og því hef ég afráðið að fara til Spánar til annað hvort Real Madrid eða Barcelona.

Forráðamenn Manchester United hafa ekki tjáð sig mikið um málið enn sem komið er, en ljóst er að þeir eru með spilin á hendi sér, enda á Ronaldo fjögur ár eftir af samningi sínum við félagið. Hann er 21 árs gamall og gekk í raðir United frá Sporting Lissabon fyrir 12,24 milljónir punda árið 2003.