Engar afsakanir

Franski þjálfarinn Henri Michel var hundfúll í dag þegar ljóst var að lið hans væri á leið heim af HM eftir tap gegn Hollendingum. Hann segist ekki nenna að bjóða upp á afsakanir eða láta fólk vorkenna liðinu.

"Allir eru að segja mér að við höfum spilað frábæra knattspyrnu, en úrslitin skipta mig meira máli. Við erum úr leik og það þýðir að Fílabeinsströndin er ekki komin í hóp bestu liða heims. Það eina sem þetta lið vantar er reynsla, en ég get ekki annað en viðurkennt að ég er vonsvikinn. Það er auðvitað aldrei gefið að ná góðum úrslitum á móti liðum eins og Argentínu og Hollandi, en við höfðum engu að síður gert okkur miklar vonir fyrir þetta mót."