Hafnaði tilboði frá Manchester United

Búlgarski framherjinn Dimitar Berbatov, sem gengur í raðir Tottenham á næstu vikum fái hann atvinnuleyfi á Englandi, segir að honum hafi borist tilboð frá Manchester United sem hann hafi hafnað.

"Ég get upplýst það núna að ég fékk tilboð frá Manchester United á sínum tíma og allir vita hvað það þýðir, en eftir að ég hitti Martin Jol (knattspyrnustjóra) að máli nokkrum sinnum - ákvað ég að ganga til liðs við Tottenham. Ég hitti Jol eftir leik Tottenham og Manchester United um daginn og strax á fyrsta fundi okkar sá ég að hann er mjög sérstakur náungi," sagði Berbatov.