Lélegasti leikur Chelsea síðan ég tók við

Jose Mourinho, stjóri Chelsea, sagðist ekki geta fundið neinar afsakanir fyrir tapinu gegn Real Betis í Meistaradeildinni í gær og sagði leikinn hafa verið lélegustu frammistöðu liðsins síðan hann tók við því á sínum tíma.

"Ég hef verið við stjórnvölinn hjá Chelsea í um 15 mánuði og um það bil 80 leiki. Leikurinn í gær var sá slakasti sem ég hef séð liðið spila allan þann tíma. Við vorum skelfilegir í fyrri hálfleik og ég hef engar afsakanir fyrir þessu tapi," sagði Mourinho, sem gat í gær ekki stillt sig um að bauna aðeins meira á kollega sinn Arsene Wenger hjá Arseal.

Arsene Wenger sagðist í gær vera að íhuga að fara í mál við Mourinho vegna niðrandi ummæla þess portúgalska, sem kallaði hann gluggagægir vegna meints áhuga hans liði Chelsea.

"Ég held ítarlega skrá yfir ummæli Wengers um Chelsea og ég get sagt ykkur að það eru engar fimm síður," sagði Mourinho, sem virðist alls ekki ætla að draga í land í orðastríðinu og segir að skjölin sem geyma ummæli Wengers um Chelsea telji rúmlega 120 blaðsíður.