Rooney átti skilið að fá rautt

Alex Ferguson segir að Wayne Rooney hafi átt skilið að fá rautt spjald í leiknum við Villareal í gær og var ekkert að verja leikmanninn þegar hann var spurður út í atvikið. "Maður klappar ekki svona fyrir dómaranum og þegar menn taka upp á svona löguðu, eiga þeir ekki von á öðru en að vera sendir af velli. Það má vel vera að fyrra gula spjaldið hafi verið dálítið loðið, en hann átti engan kost á öðru en að gefa honum annað eftir þetta atvik. Rooney er heitur karakter og við vonum að svona uppátækjum fækki þegar hann þroskast meira," sagði Ferguson, sem vildi meina að kannski hafi rauða spjaldið kostað liðið sigur í leiknum.