Hrein­skilin hnefaleikakona: „Ég er hætt að vera næs“

„Ég er að spá í hvort ég eigi ekki bara að fara að byrja að gera það eina sem virðist ganga best í dag. Það er bara að taka upp símann og pósta öllu sem ég er að hugsa þegar ég er að hugsa það, það skiptir ekki máli hvaða afleiðingar það hefur eða hvort það sé yfirhöfuð að fara með rétt mál,“ sagði Valgerður Guðsteinsdóttir í myndbandinu sínu. Ákall hennar er um það að fólk kafi lengra og kynni sér meira en það sem er áberandi á samfélagsmiðlunum.

Hún segist ekki vera mikið fyrir athyglina og að vinna hennar fari fram á bak við tjöldin en að hún sé atvinnuboxari af því að hún elskar íþróttina.

„Ég þoli ekki þennan skrípaleik,“ sagði Valgerður og er þar að vísa í það að vekja á sér athygli á samfélagsmiðlum. Hún ræðir pólitíkina í kringum íþróttina og er þakklát því fólki sem er að taka upp hanskann fyrir sig og aðra.

Virðist bara gleymast

„Það minnti mig samt einu sinni enn á það að minn akkilesarhæll er einmitt það að ég vek ekkert sérlega athygli. En einmitt þess vegna þá virðist ég bara gleymast. Ég er ekki nefnd í sumum greinum. Ég er rangnefnd,“ sagði Valgerður.

„Ekki eins og þetta sé flókið því við erum þrjú í atvinnuhnefaleikunum. Nú er ég búin að keppa á stærsta sviði sem hnefaleikakappi á Íslandi hefur gert, stærsta vettvanginum. Ég er búin að keppa á móti til dæmis heimsmeisturum, Evrópumeisturum og fleirum. Oft með engum litlum sem engum fyrirvara. Jafnvel án þjálfara,“ sagði Valgerður.

„Ég nenni ekki að vera næs lengur. Ég er hætt að vera næs,“ sagði Valgerður sem segist skorta fjármagn og fólk á bak við sig til þess að fjármagna hnefaleikalífið sitt.

Ég elska þessa íþrótt

„Ég er að þessu af því ég elska þessa íþrótt. Ég er í bullandi mínus það sem af er ferlinum mínum, þurfa að vera að keppa úti, æfa úti og borga fyrir plássið mitt á korti. Borga fyrir þjálfunina, vinna í hlutavinnu og fara í launalaust frí. Ég væri ekki að þessu ef ég elskaði ekki þessa íþrótt og allt sem hún hefur gert fyrir mig. Ég var bara að prófa að ranta og koma hérna inn án þess að hugsa,“ sagði Valgerður.

„Mér sárnar að það sé gengið fram hjá mér trekk í trekk í trekk og alls konar fokking kjaftæði sagt við mig og ég þegi bara alltaf af því að ég veit hvað er satt og hvað er ekki. Ég þarf ekki á þessu að halda,“ sagði Valgerður.

Taugaáfall og  alls konar kjaftæði

„Ég elska þessa íþrótt. Ég væri ekki í henni ef ég gerði það ekki og hún er búin að kosta mig blóð, svita, tár, peninga, taugaáfall, alls konar kjaftæði sem hefur gengið yfir mig en hún er búin að gefa mér svo margt. Ég er svo miklu, miklu sterkari og stærri manneskja en ég var. Þökk sé atvinnuhnefaleikunum,“ sagði Valgerður.

Hún bætir við að hún hafi keppt síðast í ágúst og vann þann bardaga.

„Ég er langt frá því að vera hætt. Ég er bara að bíða eftir því núna að komast aftur út. Aftur peningar, krakkar, lítið af þeim. En þess vegna er ég einmitt að detta hérna inn, blaðra, af því að athygli eykur líkur á því að ég fái styrki til þess að geta haldið áfram,“ sagði Valgerður eins og sjá má hér fyrir neðan.