Gaf Harp og tveimur öðrum ráð­gjöfum milljónir í jóla­gjöf

45 þúsund dalir samsvara um 5,4 milljónum króna.

Fáir, ef einhverjir, verja meiri tíma með Trump en hin 35 ára gamla Natalie Harp. Skrifborð hennar er rétt fyrir utan skrifstofu forsetans. Hún situr fundi með forsetanum og ferðast með honum um heiminn allan.

Þá er Harp þekkt fyrir að skilja eftir persónuleg bréf til Trumps í Hvíta húsinu . Í eitt bréfið hafði hún skrifað:

„Þú ert það eina sem skiptir mig máli.“

Harp ber tvo titla í Hvíta húsinu sem báðir snúast um að hún sé aðstoðarkona forsetans. Þá er hún með um 150 þúsund dali í laun á ári, sem samsvarar rúmum átján milljónum króna.

Sjá einnig: Hver er „mennski prentari“ Trumps?

Auk hennar fengu þeir Margor Martin og Chamberlain Harris, sem starfa einnig náið með forsetanum, einnig „peningagjöf fyrir hátíðarnar“, samkvæmt áðurnefndum opinberum gögnum.

Þá fékk Walt Nauta, aðstoðarmaður Trumps til langs tíma, tuttugu þúsund dali. Nauta var ákærður með Trump á sínum tíma vegna skjalamálsins svokallaða. Hann var sakaður um að reyna að hjálpa Trump að fela opinberu skjölin sem hann tók með sér úr Hvíta húsinu eftir fyrsta kjörtímabil hans.

Sjá einnig: Sakaður um að hafa skipað starfsmanni að eyða myndbandsupptökum

Opinberum starfsmönnum í Bandaríkjunum er heilt yfir meinað að taka við öðrum launum en fyrir opinber störf sín.

Eins og fram kemur í grein New York Times gaf ríkisstjórnin í fyrra út tilmæli um að eingöngu ætti að veita allra bestu opinberu starfsmönnunum bónusa. Var þá einnig tekið fram að bannað væri að veita bónusa til pólitískt skipaðra embættismanna.

Reuters hefur eftir einum af talsmönnum Hvíta hússins að Trump eigi sér langa sögu þess að gefa nánu starfsfólki gjafir um jólin. Það eigi bæði við almenna starfsmenn og ráðgjafa og hann hafi gert þetta bæði í einkageiranum og hinum opinbera geira.

„Þessar gjafir hafa ekkert með opinberar skyldur þessara starfsmanna að gera og eru því algerlega leyfðar samkvæmt viðeigandi lögum og siðferðisreglum,“ sagði David Ingle.