Allt bendi til lítils jökulshlaups

Þetta kemur fram í tilkynningu frá Veðurstofu Íslands.

Þar segir að leiðnimælingar gefi vísbendingar um magn jarðhitavatns í ám og bendir hækkuð leiðni til þess að lítið jökulhlaup sé í gangi. Enn sem komið er hefur vatnshæð í ánni ekki hækkað samhliða aukinni leiðni. Ekki sé þó útilokað að hún geti hækkað á næstu dögum.

„Gasmengun mælist á svæðinu og eru ferðamenn hvattir til að sýna aðgát. Þeir sem verða varir við einkenni sem gætu bent til gasmengunar, eins og sviða í augum eða koki, eru hvattir til að yfirgefa svæðið,“ segir í tilkynningunni.

Fyrir ellefu dögum, þann 18. ágúst, hófst jökulhlaup í Múlakvísl sem stóð yfir í nokkra daga. Veðurstofan heldur áfram að vakta svæðið og fylgist með þróun mála.